Fernand Braudel Center, Binghamton University
http://fbc.binghamton.edu/commentr.htm
253, 15.3.2009
Borgarkrig i USA?
Me
blir vande med
at alle slags tabu brytast ned. I media verda over blir det diskutert om det er
ein god ide å «nasjonalisere» bankar. Ingen andre enn Alan Greenspan, tilhengar
av superprofeten for den frie marknadskapitalismen Ayn Rand, sa nyleg at me
treng å nasjonalisere bankane ein gong per hundreår, og at det kan vere tida
no. Den konservative republikanske senatoren Lindsay Graham var samd med han.
Venstre-keynesianaren Alan Binder drøfta fordelar og ulemper med framlegget. Og
ettersom han trur ulempene er større enn fordelane, så var han villig til å
bruke intellektuell energi på å skrive om det i New York Times.
Etter
å ha høyrt nasjonaliseringsforslag
frå kjende erkekonservative, får me no seriøse diskusjonar om sjansane for
borgarkrig i USA. Zbigniew Brzezinski – antikommunistisk apostel og
tryggingsrådgivar for president Carter – dukka opp på morgon-TV 17. februar.
Her drøfta han sine tidlegare fråsegner om at det kunne bli klassekonfliktar i
Sambandsstatane i kjølvatnet av den økonomiske kollapsen.
Brzezinski sa han var
uroa for utsikta til «millionar på millionar av arbeidslause som stod framfor
alvorlege vanskar», folk som var blitt klar over «at rikdom ut over det vanlege
var overført til nokre få personar, utan like i historia til Amerika.» Han
minna sjåarane om at då det var ei større bankkrise i 1907, så inviterte
finansmannen JP Morgan ei gruppe rike finansmenn heim til seg, låste dei inne i
biblioteket og nekta sleppe dei ut før alle hadde punga ut til eit fond for å
stabilisere bankane. Brzezinski sa: «Kor er den pengesterke klassen i dag?
Korfor gjør dei ikkje noko, folka som tente milliardar?» Så lenge dei ikkje
gjør noko frivillig, sa Brzezinski at «det vil bli konflikt mellom klassane, og
om folk er arbeidslause og har det verkeleg vondt, helvete heller – så kan det
til og med bli opprør!»
Mest
samtidig sendte eit
europeisk kontor kalla LEAP/Europe sitt konfidensielle og månadlege Global
Europe Anticipation Bulletins til kundane sine – politikarar, offentlege
tenestemenn, forretningsmenn og investorar. Februarnummeret var heilt vigd til
geopolitisk oppløysing. Rapporten viste ikkje fram noko vakkert bilete. Han
drøfta sjansen for borgarkrig i Europa, Sambandsstatane og Japan. Han såg føre
seg «allmenn panikk» som ville føre til samanstøytar, borgarkrigsliknande tilstandar.
Ekspertane hadde enkelte
råd: «Om det er tilgang på våpen i masseomfang i landet eller regionen du bur
i, er det beste du kan gjøre å forlate regionen, om det er råd.» Det einaste av
desse landa som passar til framstillinga, med våpen i masseomfang, er USA.
Leiaren for LEAP/Europe, Frank Biancheri, sa at «det er 200 millionar våpen i
sirkulasjon i USA, og gjengvalden er alt påtakeleg.» Ekspertane som skreiv
rapporten påsto at det alt går føre seg ei utflytting av amerikanarar til
Europa, fordi «der vil den fysiske faren framleis vere marginal.»
Om Brzezinski vonar det
skal dukke opp ein ny JP Morgan i Sambandsstatane for å tvinge den
«pengesterke» klassen til fornuft, så ser LEAP/Europe-rapporten «ein siste
sjanse» i G20-møtet 2. april i London, om deltakarane kjem opp med ein
«overbevisande og dristig plan».
Desse
analysane kjem ikkje
frå venstreintellektuelle eller radikale organisasjonar. Dei er ope uttrykt
frykt frå analytikarar som sjølve er ein del av det eksisterande
etablissementet i USA og Europa. Tabu blir bare brotne når slike folk er
verkeleg redde. Poenget med å bryte tabuet er ein freistnad på å få til
overordna og raske tiltak – motstykket til at JP Morgan låste inne finansfolka
i heimen sin i 1907.
Det var lettare i 1907.
© Immanuel Wallerstein.
Omsett av Gunnar Danielsen.
[Copyright
by Immanuel Wallerstein, distributed by Agence Global. For rights and
permissions, including translations and posting to non-commercial sites, and
contact: rights@agenceglobal.com, 1.336.686.9002 or 1.336.286.6606. Permission
is granted to download, forward electronically, or e-mail to others, provided
the essay remains intact and the copyright note is displayed. To contact
author, write: immanuel.wallerstein@yale.edu.
Disse
kommentarene, publisert to ganger i måneden, er ment å være refleksjoner rundt
den samtidige verdenssituasjonen, sett, ikke ut fra dagsaktuelle overskrifter
men de lange linjer.
_____
Email this Commentary to a colleague
______________________________________________
Go to List of Commentaries